Read News in Telugu Language
adsdaksha

Hyd: ఆస్పత్రిలో భారీ అగ్నిప్రమాదం..

దక్ష న్యూస్, హైదరాబాద్: డిసెంబర్ 24

హైదరాబాద్‌లోని మెహిదీపట్నంలో ఓ ప్రైవేట్ ఆస్పత్రిలో భారీ అగ్నిప్రమాదం చోటు చేసుకుంది. అధికారులు అప్రమత్తం కావడంతో పెను ప్రమాదం తప్పింది. అత్తాపూర్‌లో గుడిమల్కాపూర్ పరిధిలోని అంకుర ఆస్పత్రిలో శనివారం (డిసెంబర్ 23) సాయంత్రం అగ్నిప్రమాదం చోటు చేసుకుంది. ఆస్పత్రిలోని టెర్రాస్‌ పైనుంచి మంటలు ఎగసిపడ్డాయి. ఆస్పత్రి ముందు భాగంలో వేలాడదీసిన ఫ్లెక్సీలకు మంటలు అంటుకోవడంతో అవి మంటల్లో కాలిపోతూ కిందకి పడిపోయాయి. అయితే, కింద నుంచి చూస్తున్న వాళ్లకు ఆస్పత్రి పైఅంతస్తులు మంటల్లో తగలబడిపోతున్నట్లు కనిపించింది.
సమాచారం అందుకున్న అగ్నిమాపక సిబ్బంది 3 ఫైరింజన్లతో హుటాహుటిన ఘటనాస్థలికి చేరుకున్నారు. మంటలను ఆర్పివేశారు. ఆస్పత్రిలో సిబ్బంది అప్రమత్తంగా వ్యవహరించి అగ్నిమాపక సాధనాలతో అప్పటికే మంటలను ఆర్పివేశారు.

Hospital

మహిళలు, పిల్లలకు సంబంధించిన ఆస్పత్రి కావడంతో స్థానికులు కూడా వెంటనే స్పందించి సహాయక కార్యక్రమాలకు సహకరించారు. ఆస్పత్రి సిబ్బందితో కలిసి రోగులను సురక్షితంగా బయటకు తీసుకొచ్చారు. అగ్నిమాపక సిబ్బంది కూడా త్వరగా స్పందించడంతో పెను ప్రమాదం తప్పింది. టెర్రస్ నుంచి ఆస్పత్రిలోని ఇతర ఫ్లోర్లకు మంటలు వ్యాపించకుండా నివారించగలిగారు.
బిల్డింగ్ ఐదో అంతస్తులో హాస్పిటల్‌లో పనిచేసే నర్సుల కోసం హాస్టల్ నిర్వహిస్తున్నారు. మంటలు వ్యాపించడంతో వారంతా ప్రాణ భయంతో కిందికి పరుగెత్తుకొచ్చారు. సర్టిఫికెట్లు, విలువైన వస్తువులను పైనే వదిలేసి వచ్చామని 100 మంది నర్సులు ఆందోళన వ్యక్తం చేశారు.

టెర్రస్‌పై ఔట్ డోర్ లైట్లలో షార్ట్ సర్క్యూట్ కారణంగా అగ్నిప్రమాదం చోటు చేసుకుందని అంకురా ఆస్పత్రి యాజమాన్యం తెలిపింది. అగ్నిమాపక విభాగం వెంటనే స్పందించడంతో ప్రమాదం తప్పిందని, ఎవరికీ ఎలాంటి హాని తలెత్తలేదని వెల్లడించింది. ఈ ప్రమాదం కారణంగా ఆ మార్గంలో భారీగా ట్రాఫిక్ నిలిచిపోయింది. ట్రాఫిక్ పోలీసులు ట్రాఫిక్‌ను క్రమబద్దీకరించారు.

Leave A Reply

Your email address will not be published.